قصيدة بحبك يا مصر
أول ما أبدي القول ... بصلي علي النبي و بقول
بحب بلدي و أهل بلدي ... في الحضر و الريف
و أحب صاحب كل قلب نضيف ... ما لطخوش الزيف
و لا أحبش الوشاش ... و أفض أكون غشاش
بحب بلدي و أهل بلدي
-----------------------------------------------------------
يا مصر ... دا أنتي الأمل و الفرح جوايا
و أنتي سبب ضحكتي من القلب و بكايا
و أنتي في ليل غربتي ... الفرشة و غطايا
يا مصر ... دا أنتي الصحاب و الصحبة و الرايا
-----------------------------------------------------------
الله أكبر ... و الآذان علي كل مدنة في مصر
الله أكبر ... في الميدان لاحت بشاير النصر
الله أكبر يا زمن... قول للتاريخ وقف هنا
قوله السلاح زرع الصباح ... علي أرض مصر المؤمنة
قوله كمان ... آن الأوان ... أمجاد زمان ترجع لنا
الله أكبر ... لاحت في الميدان بشاير نصرنا
-----------------------------------------------------------
مش كتير عليكم ... يا أشرف رجال ... تصنعوا بأديكم اللي كان محال
مش كتير عليكم ... يا أشرف رجال ... ترجعوا بمصر طايرين في العلالي
و كمان مش كتير عليكم ... ترجعولنا بالقدس و الجولان
مش كتير عليكم يا أشرف رجال
------------------------------------------------------------
بلدي النهارده ... جيت أقولك كلمتين
كلمتين ... إثنين و أمشي ... كلمتين .. إثنين يا بلدي
شلتهوملك جوة قلبي من زمان ... و جيت أفضفضلك و أديني جيت
لأجل أقولك كلمتين ... تسمعيهم ؟ ؟ ... إسمعيهم
--------------------------------------------------------------
بلدي ... لما نحس بالغربة
و لما تغيب مراكبنا في بحور التية ... بتبقي إنتي المعدية
و لما الريح تلاوعنا ... و تتمرجح قلاعنا ... بتبقي المرسي و المينا
و نجمتنا الملالية ... و مين غيرنا يا مصر يشيل همك
و أحنا لحم كتافنا من خيرك